Championnat: Una Strassen - Sporting Mertzig
Mir sinn gutt an de Match komm an haten an den éischten 20–25 Minutten déi eng oder aner gutt Méiglechkeet. Leider hu mir eis Chancen net genotzt an eis fir déi gutt Ufanksphas net belount.
Nom Hydration Break hu mir ëmmer méi d'Kontroll iwwer eist Spill verluer. Mir waren ze hektesch, wollten ze vill forcéieren an hunn de Ball ze séier erëm hierginn. Dobäi huet Strossen eis am Opbau kaum ënner Drock gesat. An dëse Momenter musse mir léieren, méi Rou ze behalen, de Ball an de Géigner lafen ze loossen an op de richtege Moment ze waarden. An der 35. Minutt kréie mir iwwer eis riets Säit den 1:0. Mat dësem Resultat goung et an d'Paus.
An der zweeter Halschent ass et eis net gelongen, méi Kontroll an eist Spill ze kréien. Och eis defensiv Organisatioun huet net ëmmer gestëmmt. No der giel-rouder Kaart fir de Simão an der 58. Minutt hu mir iwwer 30 Minutten an Ënnerzuel misse spillen an eis defensiv nei organiséieren.
Trotzdem si mir bis an d'Schlussminutten beim 1:0 bliwwen, och duerch e puer ganz staark Parade vum Yoan. Kuerz viru Schluss hate mir souguer d'Méiglechkeet op den 1:1, déi mir leider net genotzt hunn. Quasi am Géigenzuch fält an der 90. Minutt den 2:0. Duerno war de Match entscheet an an der Nospillzäit huet Strossen nach op 3:0 an 4:0 erhéicht.
Fazit: De 4:0-Endstand ass däitlech, mee mir mussen de ganze Match analyséieren. Mir mussen eis gutt Phasen konsequenter notzen, virum Goal méi effizient ginn an an eisem Ballbesëtz méi Rou entwéckelen. Net all Situatioun muss forcéiert ginn. Wa kee Géignerdrock do ass, musse mir de Ball halen, eis nei positionéieren an de Géigner beweegen. Gläichzäiteg musse mir defensiv als Equipe besser organiséiert bleiwen an eis Disziplin behalen.
➡️ Chancen notzen – Ball halen – Rou behalen – als Equipe organiséiert bleiwen.
